BAHAN SERMON PARHALADO Na pinatupa ni Inang Diakones Dorpita Simanjuntak

 

SERMON PARHALADO HKBP PERUMNAS SIMALINGKAR

SENIN, 25 APRIL 2022 

PANGUNGKAPON 5 : 11 – 14

 

I.                   PATUJOLO

Buku Pangungkapon on di surat ni si Johannes uju tarbuang ibana tu pulo Patmos. Tarbuang ibana ala marsihohot manghaporseai Jesus (1:9). Di habuangan i dipasahat Debata tu ibana taringot tu hapapatar ni bagabaga na papatarhon hamuliaon ni Kristus, na pasohothon parungkilon ni na porseai. Sian habuangan i di tongos pangungkapon on laho mangapuli huhut patoguhon haporseaon ni huria na 7 i, na marungkil ala pangaleleon ni Kaesar Domitianus. Di paksa Kaesar Dominitianus angka na porsea i ingkon marsomba tu ibana, jala diorai marsomba tu Kristus. Manang ise na tardapot marsomba jala porsea tu Jesus ingkon di pamate manang dipasiaksiak. Alani masihol angka na porsea i malua sian parhatobanon ni harajaon Rom. Di situasi na songoni ma dipapatar di Pangungkapon on hamuliaon ni Kristus, songon birubiru ni Debata, jala hamuliaon nai sude na tinompa mamujimuji jala marsomba tu Ibana.

 

II.                HATORANGAN NI TURPUK

Ayat 11-12. Dung marende na imbaru na opat parngolu dohot duapuluh opat sintuai, tarbege ma muse suara ni na torop surusuruan di humaliang ni habangsai. Bilangan nasida mansai torop, didok di ayat 11, marloksaloksa jala marriburibu. Pandohan i martujuan laho pabotohon tu huriaNa na godang do manghalashon habangsa dohot birubiru i. Marhite i naeng apulanna angka huria dohot angka na porsea na tongon marsitaonon hatihai nang di ganup tingki, paboa na godang do bilangan ni na manomba ibana di banua ginjang. Antong unang be mansohot di hasatiaon sahat rodi ujungna. Alana ndada holan diportibion sambulon ni tonditta. Disoarahon nasida gogo, na tama do Birubiru na tarbuni i manjalo hagogoon dohot hamoraon dohot hapistaran dohot sahala dohot hamuliaon dohot hasangapon nang pujipujian. Hamamate ni Birubiru (Tuhan Yesus) i di hau pinarsilang laho paluahon jolma sian pardosa. Sandok gabe pangalapan gogo dohot hamoraon do Birubiru na tarbunu i.

Ayat 13. Saluhut na masa di habangsai, na marhadomuan tu bungku, Birubiru sahat tu pamujion i langsung marpanghorhon tu nasa na tinompa, tu angka na di banua ginjang, di toru ni tano rodi laut. Tung tu saluhut na do tahe marpanghorhon, alani gabe di puji nasida Birubirui, mandok : “Puji-pujian dohot hamuliaon dohot hasangapon dohot hagogoon  rodi salelengnilelengna ma di Ibana”.

Ayat 14. Adong pandohan Amen. Marlapatan doi na mandok : “Tutu situtu ma di Debata dohot di Tuhan Jesus pujipujian, hamuliaon, hasangapon dohot hagogoon”. Jala manungkap ma sude angka na tinompa i patuduhon pamujion dohot parsombaonan tu Birubiru ni Debata.

 

III.             SIPAHUSORHUSORON

1.      Marende na imbaru do surusuruan parngolu dohot sintua i. Bilangan nasida marloksaloksa jala marriburibu, manungkap huhut marsomba tu Birubiru i. Haroro ni Birubiru i ima mambahen haimbaruon di banua ginjang, di tano on nang di banua toru. Marhite haimbaruon na pinatupa ni Birubiru i gabe sude manungkap marsomba tu Ibana. Laos on ma tugas ni hita angka na porsea mamboan haimbaruon tu tongatonga ni portibion.

2.      Unang be hita mabiar nang pe ragam tabolus angka hamaolon, tapasahat ma bulus ngolunta on, marhaposan tu Debata marhite Birubiru (Tuhan Jesus) anaknai. Naeng parsidohot ma hita di punguan na marloksaloksai dohot na marriburibui laho mangolophon hamuliaon dipambahenan ni Amai marhite Jesus Kristus. Dalanta na parsidohot mangolophon asi ni rohanai, tapaune ma angka parangenta dingolunta on.

 

 

                                                                                            Diak. Dorpita Simanjuntak 250422

---------------------------------------------------------------------------------------------------------------

SERMON DISTRIK X MEDAN ACEH

Jamita  Minggu Exaudi (Psalmen 17: 1-6)

Selasa, 24 Mei 2022

Topik: Ditangihon Debata Do Joujou Ni Partigor (Orang Benar Berseru, Tuhan Menjawab)

 

 

I.                   PATUJOLO

            Ia Psalmen 17 on, ima tangiang sian raja David uju mangido haluaon ibana sian Debata ala tongon ibana mangadopi musu na naeng mangago hosana. Ima si Saul na marsogo ni roha tu si David ala dipabangkit Debata si David gabe raja gumomgom Israel ganti ni si Saul. Sai digogohon si Saul do naeng mamunu si David manang tudia si David maporus, ingkon luluanna do jala naeng bunuonna alani sogo ni rohana i (1 Sam.19).

 

II.                HATORANGAN

                        Na dipillit Debata do si David gabe raja gumomgom Israel manggantihon si Saul na so unduk be tu hata ni Debata. Disuru Debata do si Samuel naposoNa i laho mamiahi si David gabe raja. Mulak ma raja David sian parporangan maradophon halak Palistim jala marhamonangan halak Israel na niuluhon ni si David. Marendeende ma angka parompuan Israel mandok: “Marriburibu do naung tinaluhon ni si Saul, alai anggo si David marloksaloksa do” (1 Sam.18:7). Gabe tarrimas situtu ma si Saul, mangiburu ma ibana. Ujungna gabe marhosom ni roha ma si Saul mida si David jala disangkapi rohana naeng mamunu si David ala bangkit ibana gabe raja manggantihon ibana. Atik pe ujungna gabe hela ni si Saul do si David ala dioli ibana si Mikal boru ni si Saul i (1 Sam.18:20). Saluhut sangkap ni si Saul taringot tu diri ni si David diboto si Jonatan anak ni si Saul ima aleale ni si David. Dipabotohon si Jonatan doi sude tu si David so pola marbunibuni. Alai si Mikal tung mansai holong do rohana di si David, jala dipalua ibana do si David sian sangkap pamunuon na naeng bahenon ni amanai. Alani do, gabe maporus ma si David tu pigapiga inganan laho paluahon dirina. Adong do pigapiga inganan haborhatan ni si David uju maporus ibana sian si Saul ima: Nayot, Nob, Akis, Moab, Kegila, Sip, dohot angka inganan na asing. Alai di saluhut na masa di si David i, tongtong do si David marhaporusan tu Debata. Ndang na so boi bunuon ni si David si Saul, gari angka musu na marloksaloksa nunga ditaluhon si David di parporangan. Alai ndang olo si David mamaloshon sogo ni roha ni si Saul i ala jolma na miniahan ni Debata do si Saul, dungkon ni i simatua na do si David jala ama ni si Jonatan, alealena i. Di bagasan pangaleleon on, martangiang ma si David tu Debata mangido haluaon. Laos turpuk jamita sadarion ma isi ni tangiang ni si David i.

1.        Sai tangihon ma alualungku, sai tarehon ma pinggolMu tu tangiangku.

Di tongatonga ni situasi na mansai maol, na tarancam hosa ni si David tongtong do ibana martangiang tu Debata. Ndang dipangasahon ibana pingkiran, gogo, huaso dohot na adong di ibana. Marhusari do ibana huhut martangiang tu Debata. Dihatindanghon si David do paboa Debata do sipatupa hasintongan jala na manangihon alualuna. Di situasi na maol on, ndang olo si David madabu tu bagasan pangunjunan dohot dosa. Tung mansai godang kesempatan di ibana laho mamunu si Saul alai ndang diulahon si David i. Arga do si Saul di si David. Jala ndang olo si David balik gabe mamunu si Saul atik pe tuk gogona.

2.        Sai ditatap Debata do angka naposoNa na porsea di pangurupionNa

Ndang dipasombu Debata angka jolma na porsea na manjou goarNa i. Marpanatap do Debata di hagaleon dohot di saluhut pargulmiton ni ngolu ni naposoNa i. Sasintongna diboto Debata do sude na masa di ngolu ni si David, jala boi do patupaon ni Debata uhuman manang buaton ni Debata hosa ni si Saul. Alai marhitehite na masa on, diuji Debata do haporseaon ni si David. Aha do dipangasahon si David uju mangadopi ragam ni sipingkiranna dohot pargulmiton ni ngoluna i? Tutu do jumpang haporseaon na togu. Ndang hea dipangasahon si David dirina, alai tongtong do ibana mangasahon Debata di bagasan ngoluna atik pe nunga ampe status raja di ibana, ima na manggomgomi harajaon Israel ganti ni si Saul.

3.        Sai ihuthonon ni angka na porsea i do dalan ni Debata

Adong do sada komitmen di si David na tongtong ibana satia mangihuthon bogas ni Debata manang tu dia ibana mangalangka. Na so jadi ibana manimbil sian dalan ni Debata, ndang maoraor pangalangkana. Sai ihuthononku Jesus, sai ihuthononku Jesus salelenglelengna i. Nang godang haporsuhon sai benget do au manaon, Sai ihuthononku Jesus salelenglelengna i (BE.698).

4.        Sai joujou do angka na porsea i jala marpos ni roha di haluaon na pinatupaNa

Dihatindanghon si David do paboa na holan Debata do dipajoujou ibana di pardalanan ni ngoluna. Jala na pos do rohana paboa sai tangihonon ni Debata do soara joujouna i jala na rade Debata manarehon pinggolNa tumangihon pangidoan ni angka naposoNa i. Alani, na so jadi ganggu hita di pangurupion ni Debata dompak hita na manjou goarNa i. Jala jou ma Ahu jumpa ari hagogotan, asa hupalua ho, asa dipuji ho Ahu (Psalmen 50:15).

 

III.             PANIMPULI

Topik Minggu “Ditangihon Debata do joujou ni partigor”. Ingkon marhaporseaon na togu, marpanghirimon na mangolu dohot marpos ni roha do hita di panangihonon ni Debata di tangiangta manang di panjouonta di Ibana. Ala holan Ibana do na tuk paluahon hita sian musu, dipalua ibana hosanta sian tangan ni musu jala naumbalga ima dipalua ibana hita jolma pardosa sian musu naumbalga i ima uhum ni dosa dohot huaso ni Sibolis i. Exaudi: Sai tangihon ma soarangku ale Jahowa. Pos ma rohanta sai tangihonon ni Debata do saoranta molo joujou hita tu ibana. Amen.       

 

Sermon Distrik X Medan Aceh – Diak. Dorpita Simanjuntak, 240522

--------------------------------------------------------------------------------------------------------------------

BAHAN SERMON  PARHALADO

MINGGU UJUNG  TAON PARHURIAON

EPISTEL : PARJAMITA 8:9-17      Evanggelium : 1 KORINT 15 :50-58

TOPIK: DI PAMONANG DEBATA HITA MARHITE JESUS KRISTUS 

Patujolo :

Boi do jumpang parasingan ni jolma mangantusi aha do kebahagian i? Marragam cara dipatupa jolma mangalului kebahagian i.Jala sahat tu partingkion torop jolma na manghangoluhon pandangan hidup “hedonisme”. Hedonisme i ma na mangarajumi hasonangan pardagingon i ma tujuan ni ngolu.Ala hasonangan portibi tujuan ni ngoluna dilului angka na pasonang hagiot ni dagingna marhite dalan na denggan nang na so denggan manang menghalalkan segala cara. Didok roha ni angka na manghangoluhon hedonisme daionna hasonangan hape”alogo sambing do i”Par.2 :23. Na mambahen hasonangan portibi tujuan ni ngoluna i, i do na sai mangapian tu parjahat, ala di ida mardohar parjahat.Jala Buku Parjamita on manggurithon berulang-ulang taringot ngolu di bagasan” kesiasian”/ alogo sambing songon na tarsurat par.1:2-4”Tung na laho salpu do luhutna,ninna parjamita, alogo sambing do tutu luhutna i.” Tung aha ma na hot tinggal di jolma i sian saluhut hangalutonna, na hinangaluthonna saleleng di hasiangan on.Marlaho ro angka jolma i marsundut-sundut, alai hot do anggo tano on ro di salelengna.

Hatorangan ni turpuk :

Adong manang piga pangalaho na niiuji jala diranap huhut dipaidaida si Salomo panurat ni Buku Parjamita on parasingan ni ngolu ni parjahat, sian halak na denggan tagan diportibi on pat Mat 12:33’....,.ai matua sian parbuena do tandaon hau/pohon di kenali dari buahnya :

1.     Diida si Salomo hagiot ni jolma sai naeng mangarajai donganna sahat tu na mate. “Na mangarajai donggana lapatanna na mangulahon na so denggan, menindas, marlomolomo, mambibiari, mangogapi donggana.Diida si Salomo sai adong angka panguhum/penguasa hatiha dingoluna na bertindak na so adil, menindas na niuluhonna na seharusna mangondihonsa hape  gabe marhinamago do ujungna. Agens agendo repatitur – Kejahatan yang dilakukan orang terhadap orang lain akan kembali, pada akhirnya, mencelakai diri mereka sendiri.Ay.9

2.     Boi masa sai mardohar ngolu ni angka parjahat idaonta maduma tongtong ulaonna, didok  di ay12. pola ratus hali parjahat mangulahon hajahaton bahkan sahat pola sanga sari matua ibana alai ndang tibu ro manginona pambahenanna na jahat i. Bahkan sahat tu na monding  pe angka parjahat boi do godang ragam penghormatan alai molo monding siula na denggan boi do laos so adong na manganturehonsa. Didok Parjamita i pe hata oto  do i(Ini pun sia sia).Marujung do nasa saluhut nasa parange hajahaton  i, angka kesombongan, dht ragam ulaon haholomon ai di na ro tingkina uhumanna do saluhut jolma hombar tu na niulana ai Paruhum na tigor do Debata. Ai ia i di sabur halak i do gotilonna gal.6.7.Jala ndang tagamon sonang anggo parjahat,ndang tagamon paganjangonna ariarina,ala songon halinu do ibana didok parjamita, ala so marhabiaran tu Debata, Martua sogot halak na manghabiari Debata, angka na marparange di joloNa i do na hot ro di ujungana, i ma angka na marhasonangan na mambahen Debata haposanNa. Mereka yang takut akan Allah akan beroleh kebahagian, tetapi orang fasik tidak akan beroleh kebahagian dan seperti bayang bayang dikatakan. Kebahagian orang fasik adalah semu dan sementara tetapi kebahagian orang benar kekal dan abadi.Ay10-13.

3.     Ndang tardodo jolma pingkiran dht pambahenan ni Debata. Na tangkas, na denggan jala na tigor tongtong denggan di adopan ni Debata. Pangalaho na roa jala na jahat i,  tongtong do roa jala jahat di adopan ni Debata. Nang pe sipata, hira na so pintor tangkas hataridaan ni hajahaton manang hatigoran na binahen ni jolma i. Ai hasonangan do na disangkapi Debata di ngolunta, ndada sangkap hamagoan (Jeremia 29:11).Saurdot tu na nidok ni Raja Salomo di Poda 1 :7”Biar mida Jahowa do parmulaan ni parbinotoan, alai anggo halak na oto, manoisi hapistaran dht pangajaran. Laos di ida Parjamita Salomo do nang ringkot ningolu na sai mandok mauliate jala marhasabamon disude na nilehon ni Debata, taida di ay.15”.... mangan minum dohot marlas ni roha i do na tinggal di ibana sian ulaonna saleleng ariari ni ngoluna, angka na nilehon ni Debata”. Laos i do nang taida di pandohan  “Sai padao ma sian ahu neang ni roha dohot hata gabus;hapogoson manang hamoraon unang lehon tu ahu; sai loas ma  panganonhu bohal na tinurpukhonMi tu ahu.”Poda 30:8

(Ay14-17)

Sipahusorhusoron :

1.     Asa lam marbisuk ma hita mandalani parngoluon, ai mansai godang na niula jala na ni lojong ni jolma di hasiangan on songon alogo sambing, haotoon na so marniula.Naeng tangkas tongtong manulingkiti  tujuan ni ngolu na tangkas jumpang hita holan di bagasan Tuhanta Yesus i.

2.     Godang do dirajumi jolma mansai arga di portibion, hape diujungna dung matua ibana, didok ma tu dirina”haotoon jala alogo sambing do hape sude” Boasa ma  ingkon bahenonhu jala huulahon i sian na so dalanna,  alani angka na martua jala na marhasonangan i ma angka na marhabiaran tu Debata naeng ma tahangoluhon.

3.     Nungga sahat hita tu Minggu Ujung Taon Parhuriaon songon  i nang Minggu Parningotan ni  angka  na monding, di sungguli do hita manulingkit pardalan ni ngoluta di hasiangan on songon i nang ngolu parhuriaonta ise do tabahen haposanta jala aha do tujuan ni ngolunta sahat tu partingkian on ?Na marhasonangan jala na martua i ma angka na maharbiaran tu Debata.

4.     Topik Minggu Dipamonang Debata hita marhite Jesus Kristus/Allah memberikan kita kemenangan oleh Yesus Kristus.Marhite topik on mangondolhon pabotohon  bahwa ujung ni parsiranggutonta di parngoluan on ima holan marhite Tuhanta Yesus Kristus i do dipamonang hita, diurupi, ditogu, diapuli rohanta maralohon hamaolon paraloan na diportibi on.Ai ndang adong na hot ia so dungkon dibagasan Ibana. Marhite haluaon na pinatupaNa di hita i ma marhite hahamateNa nang marhite haheheonNa ditobus jala diparade di hita hangoluan sogot sisalenglengna.Alani tapasahat nasa ngolunta holan dibagasan Ibana.

Amen. 

                                                                                                                  Diakones Dorpita Simanjuntak

--------------------------------------------------------------------------------------------------------------------

BAHAN SERMON PARHALADO HKBP PERUMNAS SIMALINGKAR

Epistel : Minggu Reminiscere Tanggal 13 Maret 2022

Senin, 07 Maret 2022, Pilipi 3:17-21

“Marguru tu lomo ni roha ni Debata”

1.      Molo adong dipatupa perlombaan pasti do membutuhkan latihan-latihan na serius asa boi mencapai sahat tu garis finish, manang mandapot hadiah. Isarana sahalak pemain bulutangkis ingkon berlatih secara teratur jala ndang terpengaruh tu masa lalu na hea ibana kecewa, alai naeng berengonna dao tu jolo asa berhasil. Suang songoni  do nang hita natoras manghirim do muse asa sude nian ianangkonta gabe anak na sukses jala berhasil. Tontu ingkon perjuanghononta do asa dapot napinarsinta na. Jala ianakhon i pe ingkon olo do manangihon angka poda dohot aturan na binahen ni natoras.

2.      Di Pilipi 3:17-21 on di ondolhon Apostel Paulus do tu halak Kristen na di Pilipi asa rade mendisplinkan diri, laho mampareahi hasadaon, jala marpangalaho songon Kristus di bagasan parngoluon siganup ari. Siala nunga lam torop halak Kristen na holan manarihon tu ngoluna sandiri. Godangan nama nasida mangalului hasangapon na rumar ima hasangapon na diportibion (Ayat 18-19). Hape parngoluon sisongoni tung maralo do tu na pinatupa ni Jesus na olo mate manobus dosa ni jolma pardosa. Apostel Paulus pe dipajongjong do hadirionna asa gabe sitiruon marhite namanadinghon angka parulaonna naso denggan alai di puspus do dalan nadi jolona. Taboto do boha jorbut ni pangalaho ni Apostel Paulus andorang so pajumpang dope dohot Jesus (Ayat 6). Alai dung pajumpang Paulus dohot Jesus tarida ma hamubaonna, sibunu halak Kristen hian do alai gabe parbarita nauli. Apostel Paulus gabe tiruan di parjuanganna laho mandapot hadiah ima panggilan sorgawi, gabe dilupahon ibana ma angka na dipudina / masa lalu (Ayat 14). Kegagalan, kekecewaan, kekurangan dohot angka hasalaan na hea diulahon ndang gabe manundati i sahat tu garis finish ima banua ginjang sambulon ni tondina.

3.      Jesus Kristus do gabe tiruan di ngolu ni Apostel Paulus. Jala Paulus gabe tiruan di halak Kristen  na adong di huria Pilipi (Ayat 17). I Timoteus 4:12..”didok ingkon gabe tiruan di panghataion, diparange, diholong niroha, dihaporseaon dohot di hatomanon”. Naeng songonima hita parhalado gabe tiruan manang di dia pe hita mangula siganup ari. Hita sandiri do napajongjonghon dirinta gabe tiruan unang tapaima halak na asing laho mambahen hita gabe tiruan. Ndang portibion na gabe tujuan ni ngolunta, jala ndang adong na boi paturehon parngoluonta so holan di bagasan Jesus (Ayat 20). Anggo holan di tano on hita manghirim di Kristus i, jolma na dumangol do hita sian saluhutna (I Korintus 15:19).

4.      Minggu Reminiscere “SAI INGOT MA ANGKA DENGGAN NI BASAM”. Diparar Debata hita gabe ulaula-Na di tongatonga ni huria (Parhalado-Na). Denggan basa-Na do pasinghophon hita, ai molo sian hadirionta tung so margogodo. Ala ni i mangula ma hita marguru tu lomo ni roha ni Debata, asa gabe tiruan / teladan hita.

“Diakones Dorpita Simanjuntak”

-------------------------------------------------------------------------------------------------------------------- 

BAHAN SERMON PARHALADO HKBP PERUMNAS SIMALINGKAR

Epistel : Minggu Pentakosta I (Parningotan Ari Hasasaor ni Tondi Porbdia) Tanggal 05 Juni 2022

Senin, 30 Mei 2022, Johannes 7 : 37 – 39a

“Mangolu di bagasan Tondi ni Debata" 

1.         Na laho do Jesus rap dohot angka siseanna mamestahon pesta parlapelapean (pesta pondok daun) tu Jerusalem. Sada pesta nabolon nasoboi lupahon nasida, marningot sejarah naung hea dibolus nasida (ompu nasida) naujui. Dinamangulahon pesta parlapelapean i adong ma dua hal sipestahonon nasida. Naparjolo marningot sejarah pardalanan ni ompu nasida di tingki haruar sian tano Misir tu tano Kanaan. Sejarah na gabe titipan doi di nasida turun-temurun, jala nunga di tonahon Debata tu ompu nasida di 3 Musa 23:40-43 (Asa tung diboto pinompar muna, paboa Ahu mambahen halak Israel maringanan di bagasan angka undung-undung, uju Ahu manogihon nasida ruar sian tano Misir, ai Ahu do Jahowa Debata munai). Napaduahon: Marpardomuan do pesta parlapelapean tu pesta gotilon (pesta panen). Pesta papunguhon hasil ni ladang nasida (2 Musa 23:16). Mansai ribur do pesta nasida disi jala digoari ma pesta i ari raya parlapelapean di Jahowa (2 Musa 23:28,34). Di tingki perayaan on ma di papungu nasida hasil panenna, mangihuthon natarsurat i, jala ditingki on ma ari raya gotilon ni angka patumonaan na niula nasida (band. 2 Musa 23:16). Ima naniula jala dipapungu hasilna, sude do tarlibat di pesta i ndang adong batasan tuan dohot hatoban, napogos dohot namora, namatua dohot naposo jala sude do parsidohot laos dipatupa ma disi acara ibadah.

2.         Dibagasan ulaon pesta i, domu tu ibadah sai dipatupa do sada ritus (angka malim prosesi mamboan aek di bagasan kendi na dibuat sian kolam Siloam). Ritus on ma na dihaporseai nasida songon dalan mandok mauliate tu Debata, asa marpanumpak Debata di angka ulaon nasida, porohon udan dohot kesuburan ni tano. Jala marningot di aek naharuar sian dolok batu di masa ni si Musa. Menurut tradisi nasida menafsirkan aek namabaor i tudoshon haroro ni Tondi Porbadia. Jadi hatiha marlangsung ulaoni disima Jesus marsoarahon “molo adong namauas tu Ahu ma ibana minum (Mateus 7:37)”. Nanaeng dohononna disi, sai na mauas do halak na manginum aek sian ambar i, Alai adong do aek na mambahen sombu uas, ima aek hangoluan nasian Tuhan Jesus (roma hamu tu Ahu, molo masihol hamu di aek na boi mambahen sombu uas ni tondi muna). Dipangke Tuhan Yesus tingki na rame i laho manuanton hasisintong ni haroroNa tu portibion.

3.         Simbol ni aek namangolu di turpukon di padomu doi tu tujuan ni pangalehonon ni Debata taringot tu Tondi Porbadia, ala di hamamasa ni turpukon ndang ro dope Tondi Porbadia, alai nunga dilumbahon ulaon ni tondi porbadia ima paiashon, pararathon (menyebarkan) dohot mangalehon ngolu naimbaru, paluahon dohot pangoluhon. Na manjou do Jesus tu saluhut jolma asa dijangkon. Dungi roma Jesus marhite Tondi Porbadia na mamboan habadiaon dohot sombu ni uas. Jadi si Johannes mangombarhon hadirion ni Jesus songon mata mual na mabaor laho paiashon (menyucikan). Taboto do, ia aek, ima sada na mansai vital (sangat menentukan hidup-mati) dingolu ni hita jolma on. Jala laos on ma naeng tangkas auhononta tu rohanta molo so mardonganton Jesus i dang boi hita jolma on mangolu.

4.         Minggu Pentakosta I (Parningotan Ari Hasasaor ni Tondi Porbdia), anggiat nian tarida dingolunta sude naung saor Tondi Parbadia i di ngolunta ganup. Taharinggashon ma partangiangan, tahariggashon parmingguon. Ise pe halak na manjanghon  Tondi i, ingkon gabe mardame di ngolu na. Mardame tu Tuhan i, mardame tu diri na sandiri, jala mardame  ma tu humaliangsa. Nuaeng pe taungkap ma pintu ni rohanta manjangkon haroro ni tondi porbadia i.

“Diakones Dorpita Simanjuntak”

--------------------------------------------------------------------------------------------------------------------

BAHAN SERMON PARHALADO HKBP PERUMNAS SIMALINGKAR

Epistel : Minggu Letare  (Johannes 4:4-14)

Senin, 24 Maret 2025

“JAHOWA MANGALEHON AEK HANGOLUAN”

Patujolo

Di ngolu on sude do hita jolma mangkilalahon hauason/mauas. Mauas di holong, dihamoraon, dihagabeon, dihasangapon dohot lan angka na asing. Jala molo manat tarimangi tung jumpang pe sude na tahauashon i sai tong dope mauas hita. Sai tong do marnahurang molo nunga dapot  pangkat na timbo sai jalahan dope muse na tumimbo, molo dapot hamoraon naeng ma muse jalahan asa lam tamba hamoraon i. Di parjumpangan ni Tuhan Jesus dohot sahalak parompuan Samaria taida ma adong dua ragam ni aek. Sada ima aek na boi pasombu uas sementara/parsatongkinan ima Aek sumur ni si Jakob. Jala aek silehonon ni Tuhan Jesus ima aek hangoluan jala na manongtong. Na so tupa mauas be rodi salelengna. Mansai balga situtu do pangkorhon ni aek di pamatang ni hita jolma. Molo minum hita saonari 1 jam manang 2 jam nari nunga pintor mauas hita. Disosoi do hita asa minum air 8 gelas atau 2 liter dalam 1 hari asa boi mardalan denggan metabolisme di dagingta on.

 

Hatorangan ni Turpuk

Marmusu do halak Juda (Israel) tu halak Samaria mamungka sian taon 720 andorang so Kristus. Di rajumi halak juda do na ramun halak Samaria, ala ndang polin be nasida songon bangso ni Debata, ala naung masiolian nasida dohot parbegu dung tarbuang nasida tu Assur. Jala sahat tu tingki ni Jesus di na gabe jolma ibana tu portibion tong dope masa parsalisian i, na so boi mardomu halak jahudi dohot halak samaria. Alai justru di keadaan sisongoni ma di jumpangi Jesus do halak na di hasogohon halak Jahudi,  marhite na menawarkan aek hangoluan asa unang mauas be tondi nasida . Di na masa on idaonta ma marragam do cara dipatupa Tuhanta i laho pasahathon pasupasuNa. Longang do roha ni boru Samaria i mangida Jesus, sahalak Jahudi mangido minum tu ibana hape halak jahudi ndang marparsaoran dohot halak Samaria. Laos disi ma dibuha Jesus sadal hal na imbaru taringot tu silehonlehon ni Debata ndada holan tu halak Jahudi alai tu saluhut jolma do termasuk ma tu halak Samaria. Didok Jesus tu boru Samaria na manahui aek sian sumur ni si Jakob sai mangulahi mauas do nasa na minum sian aek on. Dungi diuduti Jesus ma muse mandok, alai na manginum aek silehononki, na so tupa mauas be i rodi salelengna. Nanaeng dohononna aek na adong di portibion, ndang manongtongi, parsatongkinan doi, ndang tuk i laho pasombu uas. Tudos ma i songon ngolu ni jolma di portibion parsatongkinan ndang manongtong. Alai aek hangoluan na sian Tuhan Jesus manongtong jala hot rodi salelengna. Aek hangoluan na sian Jesus mangalehon hangoluan na salelengna. Dihatindangkon Jesus do hadirionna di Johannes 14:6. Ahu do dalan i dohot hasintongan dohot hangoluan, ndang adong na sahat tu amai , ia so marhite sian Ahu. Lapatanna Jesus do hangoluan jala laos Ibana do silehon ngolu, sasada ibana do sipangolu. Marhite Ibana do jumpang hita hangoluan salelengna.

 

Sipahusorhusoron

Ndang tuk hape portibion laho pasombu uasta, sai mangulahi mauas do hita (tidak pernah merasa cukup/puas, tetapi selalu merasaa kehausaan ). Songoni ma pardalanan ni ngolunta di hasiangan on, sai na mauas do hita di nasa na adong di portibion. Antong ta jangkon ma aek hangoluan na sian Tuhan Jesus asa mangolu hita. Didok pandahan ni halak batak Unang tading na rumingkot sian na ringkot . Tutu ringkot do aek na marharoroan sian portibion alai andul rumingkot ma na sian Tuhanta Jesus. Ndang marnida tempat manang tingki na mansai ganjang parjumpangan ni Jesus rap dohot boru Samaria, alai tarida do parbue ni parjumpangan dohot pangkataion i. Parjumpangan ni Tuhan Jesus mamboan suatu hamubaon (pembaharuan /tranformasi) na sai laon ibana so mararga, alai gabe tangkas do dipataridahon arga do ibana diadopan ni Tuhan Jesus. Hamagoan hian nama jambarna hape dung jumpang dohot Jesus gabe marpangkirimon. Songoni ma nang hita boha pe balga ni dosanta ro ma hita pajumpang dohot Jesus dibagasan tangiangta, jalo on na do hita jala lehononna ma aek hangoluan salelengna.    

 

Diak. Dorpita Simanjuntak

--------------------------------------------------------------------------------------------------------------------

SERMON PARHALADO HKBP PERUMNAS SIMALINGKAR

Epistel : Minggu Rogate  (Ulaon ni Apostel 16:19-34)

Senin, 19 Mei 2025

“MANANGIANGKON HASONANGON NI HUTA”

 

Patujolo

Dipardalanan ni ngolunta on, jot-jot do taadopi ragam ni angka tantangan dohot hamaolon. Sipata sai hira na punjung do panghilalaanta, lungun jala olo gabe tadok hira naso parduli Debata tu hita. Alai marhite pandohan ni Debata sadarion, idaonta ma na so hea Debata manadinghon hita, nang pe di tonga-tonga ni hamaolon. Taida ma di Ulaon ni Apostel 16:19-34, hasatiaon, tangiang dohot huaso ni Debata na mangula di ngolunta, nang pe sipata di bagasan situasi na mansai borat.

Hatorangan

1.    Tarhurung si Paulus dohot si Silas (ayat 19-24).

Taida ma songon dia si Paulus dohot si Silas mangadopi sitaonon na dokdok. Sahat ma nasida tu huta Pilipi, pajumpang ma dohot sada parompuan pangarunding godang do pangomoan ni induk somangna sian i. Diusir Paulus mai marhite tondi, jadi laos ruar ma tondi na hodar i. Muruk ma nampuna boru-boru i, ala ndang adong be sumber penghasilan nasida. Dungi ditangkup ma si Paulus dohot si Silas laos diboan ma tu pengadilan, jala ditudu ma nasida na manegai kota i jala mangajarhon angka na so hombar tu uhum ni Rom. Dilinsingi do si Paulus dohot si Silas dungi di penjarahon ma nasida.

2.    Paulus dohot Si Silas martangiang jala marende puji-pujian (ayat 25).

Di keadaan nag ok sitaonon dohot ket  idak adilan, ndang muruk si Paulus dohot si Silas tu Debata jala ndang marungut-ungut nasida. Gariada martangiang do nasida jala marende mamuji Debata di tonga borngin i. Tong do dipangasahon nasida Debata di sude situasi, nang pe manaon na hansit jala dibagasan hurungan nasida.

3.    Masa ma lalo nabolon (ayat 26).

Ditangihon Debata do tangiang dohot puji-pujian ni si Paulus dohot si Silas. Tompu ma masa lalo na mansai gogo gabe bungka sude pintu ni penjara jala madabu ma rante namangihot pat ni nasida. On ma tanda na nyata na marhuaso do Debata manguba situasi na so mungkin gabe situasi na mungkin.

4.    Hamubaon ni si jaga hurungan (ayat 27-34).

Dung di ida sijaga hurungan nunga mungkap pintu ni hurungan i, tung mabiar situtu do ibana, ai molo adong tahanan na malua, ingkon hona uhuman mate do ibana. Gabe naeng maningkot ma si Jaga hurungan i, alai di dok si Paulus ma : unang bahen jea tu ho, ai di son do hami saluhutna. Dungi di dok si jaga hurungan ima : aha ma bahenonhu asa malua ahu ? Dialusi si Paulus ma ibana : Haporsea ma Jesus, asa malua ho dohot isi ni bagas mu. Dungi ditogihon si jaga hurungan i ma si Paulus dohot si Silas tu jabuna, jala tardidi ma si jaga hurungan i dohot sude keluargana. Taida ma dison na masai, ndang holan mangula Debata laho paluahon si Paulus dohot si Silas alai dohot do mamboan panjaga hurungan ni dohot keluarga na tu haluaon. Hasatiaon dohot tangiang ni Paulus dohot si Silas mamboan hatiuron dohot haluaon tu angka dongan.

Panimpuli

Ndang he di tadinghon Debata bangsona nang pe di situasi na mansai borat situtu. Ndang dibahen Paulus dohot si Silas sitaonon i manang keadaan i mangambati nasida marpangunsandean tu Debata. Torus do nasida marende jala umpuji Debata di bagasan ngoluna. Boi do di pangke Debata ganup sitaonon na taadopi tu sangkap ni rohaNa na umbalga. Olo do suhar tu rohanta boasa ingkon bolusonta angka hamaolon na borat i, alai pos ma rohanta sai didongani Debata do hita jala sai papataron ni Debata do hamuliaon na (Mateus 28:20b, alai ida ma sai dongananhu do hamu ganup ari rasi rasa ro ajal ni hasiangan on). Sai tagogohon ma martangiang tu Tuhan Jesus jala tongtong satia huhut marhaposan tu Debata, nang pe di bagasan hamaolon, unang mandele hita molo pe taadopi angka hamaolon, ai ndang hea di tadinghon Debata hita, asal ma tahaporseai Tuhan Jesus asa malua  hita rap dohot isi ni bagasta.

Diak. Dorpita Simanjuntak